Membro sa Bayan gipusil

Lider sa militanteng partilistang Bayan Muna diha sa lungsod sa Tuburan gitipi sa duha ka wala mailhing mga lalaking luwan sa usa ka motorsiklong nagpakaaron-ingnong nangita'g gasolinahan.

Giila sa mga imbestigador sa Tuburan police ang biktimang si Allan Villacencio, 42 anyos, ug molupyo sa Barangay Caridad sa maong lungsod kinsa giingong maoy lider sa pundok sa Bayan Muna sa nahisgutang lungsod.

Sumala pa sa gitug-an sa asawa nga si Myrna nag-uban sila sa iyang bana diha sa gawas nga naglingkod sa lantay dihang naabot ang duha ka wala mailhing lalaki luwan sa usa ka motorsiklo.

Ang lalaking backrider nga nagsuot og kawo gikatahong miduol kanila ug nangutana kun asa makapalit og gasolina sa duol, apan dihang mibarog si Villacencio aron unta itudlo ang direksyon kalit nga mibunot og armas ang suspek dayong pusil makadaghang higayon kaniya.

Human sa hitabo daling miikyas ang mga suspek luwan sa motorsiklo samtang nakabsan sa kinabuhi ang biktima gumikan sa naangkong samad pinusilan sa liog, tiyan ug kilid. Usa ka basiyo sa kalibre .45 nga bala ug slugs ang narekober diha sa crime scene.

Ang Karapatan dali dayong mipasangil sa mga sakop sa 78th Infantry Batallion nga maoy utok sa insidente gumikan sa pasangil nga pareho og estilo ang pagpatay pagpusil usab sa usa nila ka miyembro nga si Emilou Cruz niadtong Nobiyembre 24.

Si Cruz nakalingkawas sa kamatayon samtang ilang gipasakaan og kaso ang usa ka sakop sa 78th IB nga si Sgt. Ricky Lao ug duha pa ka kauban niini nga maoy gitumbok nga namusil sa ilang miyembro.

Si Dennis Abarientos sa Karapatan mitug-an sa Banat News nga walay laing ilang mapasanginlan kundili ang militar gumikan kay walay kaaway ang biktima diha sa ilang dapit.

Matud pa ni Abarientos nga dugay nang lider sa Bayan Muna ang biktima sanglit mao kini ang campaigner sa maong partilista niadtong 2004 election, dugang pa niya nga council member usab ang biktima sa Nagkahiusang Kahugpongan sa mga Mag-uuma Alang sa Kagawasan ug Tinuod nga Demokrasya (NAKAMATIKOD) diha sa maong lungsod.

Giawhag karon ni Abarientos ang lokal nga kagamhanan sa Tuburan sa pagpapahawa na sa 78th IB diha pinaagi sa pag-implementar sa resolusyon sa lungsod nga nagdili sa pagbutang og mga kampo militar sa daghang mga molupyo ug ingon man ang paghimo og resolusyon nga nagkondenar sa maong pagpatay.

Gikatakdang mosubay ang Bayan Muna ngadto sa lugar uban usab sa grupo ni Abarientos aron magpakisusi sa hitabo.