2006 projects sa Mandaue gibutyag

Gipaneguro ni Mayor Thadeo Ouano nga hingpit gayod niyang ikapatuman ang mga dagkong mga proyekto sa tuig 2006 sanglit nahan-ay na man niya ang plano alang sa pagpatuman niini.

Kini ang iyang giluwatang pamahayag sa pagpakighinabi sa Banat News niadtong miaging adlaw.

Matud pa niya nga naglangkob sa mga multi-million intrastructure project ang iyang mga proyekto nga iyang gipaningkamutan nga mahingpit gayod nga kahatagan og katumanan sa tuig 2006.

Naglakip niini mao ang pagtiwas sa kaugmaran sa modernong merkado publiko nga nagpadayon na ang kaugmaran sa Tulay, Centro, ang Bagsakan Center sa Ibabao-Estancia ug International Convention Center sa Reclamation Area.

Dugang pa ni Ouano nga may mga pagpalapad usab sa mga dalan sa kabarangayan nga nalangan pa sa pagpatuman tungod sa gamay nga mga kakulian nga naglakip niini ang Tabok-Tingob road ug uban pa.

Matud pa niya nga ang maong mga proyekto nagkinahanglan na lamang og gahin nga pundong salapi ug iyang gipaningkamutan nga kapahimuslan kini sa mga Mandauehanon ubos sa pagtapos usab sa katapusang termino sa iyang administrasyon.