Minahan sa Dalaguete di pabuksan

Dili pa gyud paablihan pagbalik sa Department of Energy ang miulbo nga minahan sa lungsod sa Dalaguete.

Kini ang gipahibawo ni DOE-7 director Antonio Labios bisan nahingpit na sa retrieval team ang pag-ugkat sa mga patay'ng lawas sa mga biktima.

Matud pa ni Labios nga ila una humanon ang imbestigasyon ug ang pagsusi sa kahimtang karon sa minahan nga gidumala sa Ibalong Resources and Development Corp. human sa insidente niadtong Disyembre 10.

Ang DOE-7 nagsugod na sa ilang imbestigasyon sa maong kaso sa niaging adlaw.

Naugkat ang katapusang duha sa unom ka patay'ng lawas sa mga biktima nga natanggong ilawom sa minahan niadtong Disyembre 24.

Susihon usab sa DOE ang giingong pagpabaya sa tagdumala sa Ibalong hinungdan nga nahitabo ang insidente.

Ang gipangayo hinoon sa DOE sumala pa ni Labios mao ang igong ventilation aron makahungaw ang gas sa ilawom sa minahan aron mahimong sayon ang pagsulod sa iyang mga sakop nga mohimo sa inspeksiyon sa sulod nga bahin.