P1.5M kabhang sa bodyong gisakmit

Gibana-banang moabot sa P1.5-milyones ang kantidad sa kabhang sa bodyong nga gisakmit sa operatiba sa Naval Forces Central ug Customs Intelligence and Investigation Branch atol sa Pasko.

Kagahapon pa giablihan ang duha ka 10-footer container vans nga gisudlan sa maong mga kinhason human nimando si Cebu Customs Collector Lourdes Mangaoang.

Ang maong mga kinhason gikan sa Zamboanga City luwan sa MV Aleson nga gidunggo sa pier 2 sa syudad sa Sugbo.

Atol sa pagdakop, ang manifesto nagbutyag nga mga pinauga nga goso ang sulod sa van apan gipugngan kini sa mga operatiba sanglit nakadawat sila og intelligence report nga mga bodyong ang sulod niini.

Matud pa ni Cebu City Bantay Dagat Commission project director Elpidio Dela Victoria kinsa nisaksi sa pag-abli sa vans nga ilegal ang kargamento sanglit gi-ban man ang pagpanguha sa maong mga kinhason.

Gihatagan ni Mangaoang og 24 oras ang giingong tag-iya sa kargamento nga nailhan lang nga Mr. Arias base sa manifesto sa barko nga mopatim-aw sa dili pa niya kini itugyan ngadto sa Naval Forces Central.