Dinamitero gi-rescue sa kaubanan napatay

Patay ang usa ka gidudahang "dinamitero" human kini mapusili sa wala pa mailhing tawo dihang giingong gisuwayan og "rescue" sa iyang mga kaubanan dihang nadakpan nga nag-deal sa binuthang isda niadtong Martes sa buntag diha sa lungsod sa Bantayan

Napusilan sa gituohang shotgun ang biktimang si Leomar Golisao, 22, minyo ug molupyo sa Barangay Lipayran, isla sa Mambacayao sa naasoy'ng lungsod.

Sumala pa ni SPO4 Melquiades Seares ang officer in charge sa kapolisan sa Bantayan sa pakighinabi sa Banat News nga naaktuhan ang grupo ni Golisao diha sa barangay Solangan nga nagbaligya na sa "binuthang" isda ngadto sa mamalitay nga taga Medellin.

Gikatahong ang barangay Kapitan sa Solangan nga si Alberto Geran maoy nangulo sa pagdakop sa mga suspek apan dihang nadakpan si Golisao ug usa pa niini ka kauban mipaduol ang pumpboat nga nagpaabot diha sa lawom nga bahin diin ang mga sakay niini kalit nga milabay og duha ka dinamita sa grupo ni Geran hinungdan sa ilang pagkatibulaag ug nakahigayon ang kauban ni Golisao nga makalangoy ngadto sa pumpboat.

Giingong nianang tungura kalit nga mipaka ang buto-buto sa armas ug diha-diha nahagba si Golisao samtang misutoy na palawod ang mga kaubanan niini.

Matud pa ni Seares nga sayo pa sa buntag dunay misumbong sa kapitan sa Solangan nga dunay nag-dinamita sa isla sa Panitogon nga gideklarar sa lungsod nga marine sanctuary maong ilang gisubay ang kabaybayunan ug diha nila maabti nga gi-deal na ang mga isda.

Duha sa mga namalit sa 61 ka kilong "binuthang" isda nga balor og P3,500 nasikop atol sa maong ronda giilang sila si Reynaldo Rosales, 35, ug Neil Rosales, 20 nga taga Maghawak, Medellin, ang duha nakapiyansa kagahapon og tag P3mil matag usa.

Apan kagahapon sumala pa ni Seares mialegar ang mga kabanay sa namatay nga si Kapitan Geran maoy nakit-an sa mga testigo nga mipusil kang Golisao ginamit ang usa ka 'pugakhang.'

Si Seares nagkanayon nga andam ang ilang buhatan sa pagdawat sa reklamo unya sa habig sa namatay kun mopasaka sila og kaso batok kang Geran, apan nagduda siyang dili kini mohinayon sa pagkiha gumikan kay matud pa niya nga posibleng ang mga testigos kaubanan ra usab ni Golisao niadtong higayuna nga milabay og dinamita sa grupo sa kapitan.

Hinuon wala kabuto ang duha ka dinamita nga gilabay sa mga illegal fishers sanglit nadala kini sa buhatan sa kapolisan human sa insidente.