Bomba nakuykoyan sa bukid

Usa ka buhing bomba nakuykoyan sa bukirang barangay sa Sityo Tac-an, Budlaan sakop ning dakbayan sa Sugbo niadtong miaging adlaw.

Usa ka panday nga si Erwin Oporan, 35 anyos, maoy aksidenting nakakaplag sa maong bomba samtang nagkawot kini sa luna nga gipanag-iya sa usa ka Elena Archival.

Daling gi-alarma ang mga sakop sa SWAT sa Cebu City Police Office (CCPO) sa mga molupyo sa maong barangay kabahin sa nakaplagan nga bomba.

Gibutyag ni Oporan nga niadto pang petsa 22 ning bulana nakaplagan niya ang maong bomba nga iyang gitipigan og pipila ka mga adlaw una pa gipahibawo sa iyang mga silingan ug gi-report ngadto sa kapolisan.

Gikonpirmar sa mga mirespondi nga sakop sa SWAT nga usa ka 81 mm mortar ammunition ang klase sa bomba nga nakaplagan gikan sa maong lugar nga gituohang biya sa milabay'ng ikaduhang gubat sa kalibutan.

Kasamtangan karong gi-kostodiya sa SWAT ang maong bomba og gitakda nila kining itugyan ngadto sa Central Command.