Mga Badjao gipriso sa BBRC

Gibalhog na sa Bagong Buhay Rehabilitation Center (BBRC) ang walo ka mga tawo sagad niini mga Badjao nga gipasakaan og kaso sa siyudad gumikan sa paggamit og mga bata sa ilang modus operandi nga pagpakilimos sa mga kadalanan dinhi sa dakbayan.

Kini maoy nahipos nga kasayuran sa Banat News gikan sa record sa Cebu City Disaster Coordinating Council (CCDCC) nga maoy usa sa nangusog ning pagpatuman karun sa Anti-Mendicancy Ordinance sa dakbayan.

Ang korte mirekomendar hinuon og P14 mil nga piyansa matag usa sa maong walo ka mga dinakpan alang sa ilang temporaryong kagawasan.

Gikan niadtong petsa 20 ning bulana sa pormal nga pagpatuman sa ordinansa nasuta nga duna nay 101 ka mga dinakpan nga nagpakilimos sa mga kadalanan dinhi sa dakbayan apil na kadtong mga tawo nga migamit og mga bata sa ilang pagpakilimos.

Gibutyag ni Jimpaul Saavedra, staff sa CCDCC nga mibalik na usab ang ilang operasyon human sa duha ka adlaw nilang pahuway sa milabay'ng Pasko.