Ang mitaho sa kapolisan sa dakbayan sa Toledo mao ang usa ka inahan nga si Lydia Pasaylo, 58, taga Magsaysay Hills sa maong syudad nga gidagit ang iyang anak nga si Maria Luz Pasaylo, 24 anyos.
Usa ka kanhi polis nga si Rudy Panlo, Sr. ang gitumbok nga nidagit sa dalaga niadtong Disyembre 22 sa alas 12 ang takna sa udto sa may barangay Tubod sa maong syudad.
Gitawgan sa hepe sa kapolisan sa dakbayan sa Toledo, Supt. Leodegardo Acebedo ang cellphone number nga dala ni Lydia nga gihatag ni Maria Luz ngadto kaniya sa wala pa ang insidenti.
Ang nakatubag kang Acebedo mao ang anak ni Panlo nga si Rudy, Jr.
Si Rudy, Jr. ang nagpahibalo kang Acebedo nga siya ang nagmaneho sa ilang sakyanan sa paghatud sa iyang amahan ug kang Maria Luz sa Mactan Cebu International Airport niadtong Disyembre 23, mga alas 11 sa buntag aron molarga sa Manila.
Ang anak sa suspek mitug-an usab sa kapolisan nga manag-uyab ang duha ug wala pugsa sa iyang amahan ang dalaga sa pagpakuyog kaniya.
Si SPO1 Thadeo Lapening sa kapolisan sa dakbayan sa Toledo mitug-an usab nga nakaila sila sa dalaga nga uyab kini ni Panlo, Sr.
Nunot niini, gipahibawo ni Acebedo ang inahan sa dalaga nga walay kidnapping nga nahitabo sa ilang anak sanglit nasuta nga uyab kini sa gitumbok nga suspek.
Nabalaka lang ang inahan sanglit umaabot ang uyab sa iyang anak nga langyaw.