Mayor, bise-mayor, konsehales umentohan, ok ni Tomas

Ipatuman na ang omento sa suholan sa tanang mga opisyal sa siyudad sa Sugbo sugod karung sunod tuig gikan sa mayor, bise mayor ug mga konsehal niini.

Kini human gipahibalo sa mayor atol sa press conference niini kagahapong adlawa nga mosugot na siya nga umentohan ang suholan sa mga elected officials ubos sa kondisyon nga paabuton una niya ang opisyal nga pagtugot gikan sa Department of Budget and Management (DBM).

Gibasehan niini ang naaprobahang ordinansa kaniadto ni Konsehal Manuel Legaspi niadtong tuig 2003 nga gitumong alang sa paghatag og umento sa suholan sa mga elected officials dinhi sa dakbayan.

Subay sa maong ordinansa, 10 porsiyento ang girekomendar nga usbaw sa suholan sa tanang mga elected officials sa siyudad nga gibase sa 1989 Salary Standardization Law.

Ang maong naaprobahang resolusyon gitakda pang mo-epekto karung sunod tuig apan ang makapahimulos lang niini kadtong mga piniling opisyal nga anaa na sa ikaduha ug ikatulong termino ug dili makapahimulos niini ang mga opisyal nga anaa pa sa unang termino.

Apan alang kang Osmeña dili siya pabor nga ipatuman ang maong usbaw nga dili patas kun ma-apil sa maong benepisyo ang tanang mga kawani sa Cebu City Hall.

Nahibaw-an usab karung bag-o sa mayor nga ang mga kawani sa siyudad makapahimulos kini sa usbaw sa suholan ka usa sa matag tulo ka tuig.