Negosyante gipusil samtang nag-withdraw

Kritikal ang kahimtang sa usa ka 41-anyos negosyante human kini pusila sa wala mailhing lalaki samtang ang biktima nag-withdraw og kwarta sa usa ka ATM machine kilid sa usa ka department store sa barangay Tabunok dakbayan sa Talisay kagahapon sa buntag.

Ang biktimang si Baby Yu taga Sityo Sangi, Tabunok nakaangkon og samad pinusilan sa walang bahin sa iyang lawas ug tuong kamot human kini pusila sa nag-inusarang tawo luwan sa usa ka motorsiklo nga tambukon, mubuon ug nagsuot og helmet.

Si SPO2 Edgar Cauzon sa pakighinabi sa Banat News mitug-an nga layo kaayo ang anggulo nga tulis ang intensyon sa suspek sanglit 5 ngadto sa unom ka metros gikan sa gikahimutangan sa biktima gipusil na kini dayon sa suspek nga wala monaog sa motorsiklo niini.

Sumala pa sa asawa sa biktima ngadto kang Cauzon gipusil tulo ka higayon ang iyang bana samtang base usab sa pamahayag sa mga testigos duha ka higayon ra kini pusila sa suspek.

Matud pa sa mga nakakita ang suspek luwan sa usa ka Kawasaki Aura nga kolor pula nga dunay numero sa plakang #4204 apan wala makuha sa mga saksi ang prefix sa plaka sa maong motorsiklo.

Paghuman og pamusil sa suspetsado mipasutoy og padagan sa motorsiklo padulong sa usa ka tindahan og lechon diin dunay laing tawo nga miangkas una pa milahos og ikyas padulong sa direksyon sa dakbayan Sugbu.

"Duna daw tawong miangkas, duda nako mao to ang "finger"(look-out) sa suspek," asoy pang Cauzon kinsa nagtuong posibleng personal nga kontra o ba kaha may kalambigitan sa negosyo ang motibo sanglit wala paman makaistorya ang banay sa biktima.

Ang biktima kaabag sa iyang amahang nagnegosyo og banking and lending ingon man lumber yard diha sa barangay Sangi.

Nakuha sa kapolisan gikan sa crime scene ang business card holder nga may sulod nga 30 ka ATM cards, kwartang P5,000, duha ka resibo sa ATM nga gipanag-iya sa biktima, lakip sa nakuha mao ang usa ka slug sa wala pa matinong kalibre sa bala. - Uban sa taho ni Brenda Batuto