Trapiko estriktohon sa Enero

Estrikto nang ipatuman sa City Traffic Operations and Management (CITOM) ang tanang mga lagda sa trapiko sa mga kadalanan dinhi sa dakbayan sa Sugbo sugod karong Enero dos sunod tuig.

Tipik ug kabahin kini sa mga pagpangandam nga himuon sa siyudad sa pag-host sa 12th ASEAN Summit nga himuon unya sa Disyembre sunod tuig dinhi sa dakbayan sa Sugbo.

Gipahibalo ni City Information Officer Nagiel Bañacia nga tukoron usab ning higayona ang task force nga mopatuman sa "no fault zone" ilabi na diha sa Banilad area.

Kini magpasabot nga sugod sa sunod tuig dakpon na kadtong mga publiko ug pribadong sakyanan nga makalapas sa ipatuman unya nga "no stopping" ingon man "No parking" gikan sa Gorordo ngadto na sa Archbishops Reyes Avenue lahos sa Banilad.

Gipasabot ni Bañacia nga gihimo nila ang maong lakang gumikan kay ang maong lugar mao man unyay agian sa mga head of state nga motambong sa ASEAN Summit dinhi sa dakbayan sa ilang pag-estar diha sa Waterfront Hotel.

Gawas niini, magbutang usab og mga towing vehicle sa ubang mga dapit sama diha sa Sacred Heart School nga kanunay'ng makasinati og suliran sa trapiko aron kadtong mga motorista nga makalapas sa lagda i-deretso na lang kini og karga.

Mag-hire usab og dugang 60 ka mga personnel ang CITOM ug ingon man mopalit og 20 ka mga motor aron mapatunhay ang dagan sa trapiko sa dakbayan.

Gikonpirmar hinoon ni Mayor Tomas Osmeña ang maong mga nakab-ot nga desisyon ilabi na ang pag-deklarar og no fault zone diha sa dalan Banilad subay usab sa rekomendasyon gikan ni LTFRB-7 Director Rogelio Osmeña Jr.