Kiha vs Ibalong gitun-an

Gitun-an karon ni Dalaguete Mayor Ronald Alan Cesante kung sa unsang paagi makapasaka og reklamo ang iyang buhatan batok sa mga tinugyanan sa Ibalong Resources and Development Corporation tungod sa trahedya nga nikalas og walo ka tawo.

Si Cesante sa pakighinabi sa Banat News mitug-an nga iyang gisubay sa balaod kun unsay papel sa lokal nga kagamhanan sa coal mining ug sa ilang mga hurisdiksyon sanglit matud pa niya nga base sa kasamtangang mga balaod, ang mga coal mining industries gitugotang makamina ilawom sa pagdumala ug pagtugot sa nasudnong pangagamhanan.

Giangkon ni Cesante nga sa pagkakaron ila unang pasagdan ang Department of Energy nga mag-imbestigar ug anha na lang sila mohimo og lakang kun makakuha sila og kopya sa resulta aron itandi sa kun unsay "safety standards" sa maong mga minahan.

"Ato pang tan-awon ang protocol kun unsay role nato (LGU) ani, pero nag-gather na ta og mga data sa mga reklamo sa mga minero," asoy pang Cesante.

Dugang pa niya mawad-an unya og pulos ang ilang paninguha kun walay igong kapasikaran ang ilang mga ireklamo maong alang kang Cesante mas maayo kung makakuha sila og kopya sa mga safety standards, kontrata ug uban pang mga dokumentos kalabot sa pag-operate sa mga minahan sa ilang mga dapit.

Samtang gihatud na pasado alas 11 gabii niadtong Martes ngadto sa Barangay Malinao, lungsod sa Basay Negros Oriental ang minerong si Nelson Villasis kinsa maoy unang naugkat sa unom ka nahibiling minero nga gisundan sa duha nga sila si Jaime Sanchez ug Antonio Jose.

Samtang si Department of Energy 7 Director Antonio Labios sa pakighinabi sa Banat News subling mihimakak sa pasangil nga "nabayran" ang iyang mga sakop nga nag-inspeksyon sa minahan sa Ibalong.

Kini human manggawas ang lain na usab nga mga pasangil nga maong wala mangadto sa "site" ang mga inspectors kay gisubornuhan kini sa mga taga Ibalong aron dili na personal nga mosusi sa tunnel.

Giangkon hinuon niya nga human mag-inspeksyon sa mga tunnels abi-abihon sa mga mining firms ang mga inspectors sanglit duha ka adlaw ngadto sa usa ka semana man una pa mahuman ang pag-inspect sa mga tunnel ug anha na mangatulog sa bunkers sa minahan ang mga taga DOE hangtud mahuman.

Gibutyag usab niya nga andam ang iyang buhatan nga ipailawom sa imbestigasyon kalabot sa alegasyon ug gihagit niya ang mialegar sa pag-imbitar og laing ahensya sa gobiyerno nga mohimo og linaing imbestigasyon sa maong isyu