Kompaniya gi-ralihan sa mga bayot

Mga kahugpungan sa "third sex" kun mga bayot mipahigayon og rally atubangan sa usa ka kompanya sa Mandaue agig pagsuporta sa kanhi presidente niini kinsa gitaktak sa iyang amahan.

Ang grupo sa Self-Motivated Gays Association of Cebu City mipadayag sa ilang suporta kang Wesy Quisumbing ang anak ni Norberto Quisumbing nga maoy tag-iya sa Norkis.

Si Wesy mipasangil nga gitakwil siya sa iyang amahan gumikan sa iyang pagpa-sex transplant gikan sa pagka-lalaki ngadto na sa pagka-babaye.

Si SEMGA President Ronnie Sab-a miingon nga bisan wala sila magkaila ni Wesy, ang ilang pag-rally mao ang pagpanawagan sa patas nga pagtagad sa mga "third sex" ug pagrespeto sa katungod niini ug pagpalayo kanila sa diskriminasyon.

"We are here for a cause to fight the right of gays and against discrimination we are not motivated by anybody else. There should be gender equality among every individuals. We have our own right. Our right to work and the right to everything," sumala pa ni Sab-a.

Mitataw si Sab-a nga nakadungog lang sila sa mga report sa media kalabot sa panagbangi tali ni Wesy ug sa iyang amahan nga si Norberto.

Sumala pa niya nga apektado silang mga bayot sa maong isyu tungod sa klaro nga diskriminasyon sa pagka-tawo ni Wesy. Si Wesy, matud niya, nakig-away lamang aron pagprotehir sa iyang katungod.

Matud niya nga sama sa ordinaryong tawo, ang mga bayot adunay katungod sa pagpanarbaho ug pag-angkon og posisyon sa bisan unsang kompaniya.

"Being a gay is not a hindrance to success."

Ang panagbangi sa mag-amahan nagsugod sa dihang si Wesy misang-at og injunction sa korte batok sa iyang amahan human siya gitaktak isip presidente ug chief executive officer sa Norkis Distributors ug Norkis Summa Group of Companies.

Si Secretary Bert Emphasis, kinsa suod sa mga Quisumbing, mi-apelar sa mga sakop sa media sa dili na pagtandog sa bangi sa mag-amahan tungod kay matud niya usa lamang kini ka "family affair" nga sila lamang nga pamilya ang nasayod.