Gagmay'ng negosyante tabangan

Tabangan sa kagamhanan sa dakbayan sa Sugbo ang mga gagmay'ng negosyante ingon man kadtong mga tawo nga gustong makabaton og ginagmay'ng panginabuhi-an aron makasugakod batok ning krisis nga gi-atubang sa nasud.

Kini maoy tumong sa gi-umol ni konsehal Arsenio Pacaña, tsirman sa committee on commerce trade and industry sa konseho nga paghiusa sa small and medium enterprises nga ania magbase dinhi sa dakbayan.

Gibutyag sa konsehal nga ila kining gimugna aron mahatagan og giya ang maong mga negosyante nga makasugakod sa ilang ginagmay'ng pamatigayon.

Plano usab sa konsehal nga mohimo og mga pamaagi aron matudloan kadtong mga indibidwal nga nagtinguha nga makabaton og ginagmay'ng negosyo ug ingon man ang pagpatabang aron ma-promote ang mga kinaugalingong produkto pinaagi sa trade fairs.