3 sa 6 ka minero naugkat, patay na

Tulo sa unom ka minerong natabunan niadtong Disyembre 10 diha sa Ibalong Resources and Development Corporation naugkat na kagahapon ug patay na samtang laing duha ka patay'ng lawas ang nakit-an na usab apan naglisod ang mga rescuers sa pagduol gumikan kay naghinay-hinay og kahugno ang carbon diha sa gikahimutangan sa duha.

Kini human sa paninguha sa 13- man rescue and retrieval team nga gilangkuban sa upat ka bombero sa Bureau of Fire Protection pinanguluhan mismo ni Sr.Supt. Anderson Comar ug walo ka mga minero uban ni Engineer Isagani Salazar.

Unang napagawas sa lungag mao ang patay'ng lawas ni Nelson Villasis, 32, taga Basay, Negros Oriental nga nasigpatan alas 3 pa sa kadlawon kagahapon ug napagawas gikan sa lungag alas 7 pasado na.

Nahimong sukaran sa pag-ila sa mga minero ang numero sa ilang mga baterya sa flashlight nga maoy gilista sa Ibalong.

Matud pa sa asawa ni Villasis nga si Thelma sa pakighinabi sa mga tigbalita nga ang purol ug panglawas nalang niini ang iyang nailhan gumikan kay nawingig ang nawong niini.

Sunod nga napagawas mao ang patay'ng lawas nila ni Jaime Sanchez ug Antonio Jose alas 9:35 nga pulos nakaangkon og kadaut sa ulo ug nawong gumikan sa gituohang paghugmak sa carbon diha kanila.

Sumala pa nga nasigpatan ang lawas sa mga biktima diha sa tunga-tungang bahin sa RIS 6 ug RIS 7 human mahabwa ang gatusan ka toneladang carbon nga mitabon kanila.

Ang ulahing duha ka minerong nakuha nalangan og gamay hangtud nabutangan og bara-bara nga kahoy ang kisame sa tunnel diin sila mahimutang gumikan kay giingong naghinay-hinay nasad kini og katumpag.

Dunay gireklamo ang mga kabanay sa mga biktima gumikan sa giingong duna silay nadunggan anha kuhaon sa ilang dawatong kwarta gikan sa Ibalong ang nakuha nilang mga pagkaon sa kooperatiba nga giisip sa mga kabanay nga dili makiangayon.

Ang igsuon ni Villasis nga si Rosemarie Villasis mipadayag nga ilang sutaon ang kamatuuran sa maong reklamo ug mihangyo sa kadagkuan sa Ibalong nga matabangan sila sa pagdala sa patay'ng lawas sa iyang igsuon ngadto sa Negros Oriental.

Si Rydal Cisnero ang administrative officer ni Mayor Ronald Alan Cesante sa pakighinabi sa Banat News mibutyag nga dunay tabang nga ihatag ang mayor ngadto sa mga kabanay sa mga biktima uban usab sa hinabang nga gisaad ni Gobernador Gwendolyn Garcia.

Samtang mipasalig si Cisnero nga ilang subayon ang mga reklamo sa mga kabanay kabahin sa maong deduction kung wala ba kini makalapas sa balaod sa mamumuo apan miklaro nga dunay kaugalingong polisiya ang mga kompanya.

Gipadayag ni Cisnero nga gituohang ang nahibiling tulo ka mga minero posibleng didto sa RIS 8 ngadto sa RIS 10 kini nahimutang ug kinahanglang kuykuyon pa. Uban sa taho ni Brenda Batuto