Mag-uuma gitigbas, gipusdaka'g bato sa ulo

Usa ka linoog nga pagpatay na usab ang mitay-og sa lungsod sa Argao human mapalgi ang usa ka mag-uuma nga dunay daghang samad tinigbasan sa nawong ug dinakdakag bato sa ulo ug gituohan pang gituok og pisi sa kabaw diha sa kasagbutan sa barangay Tulang sa naasoy'ng lungsod niadtong Sabado.

Napalgan sa iyang 18 anyos nga anak ang biktimang si Pergintino Allawan,43, minyo ug molupyo sa nahisgutang barangay sayo sa buntag niadtong Sabado diin kini nanguha og kumpay para sa iyang karabaw.

Sumala pa ni SPO1 Edwin Miranda, imbestigador sa Argao Police Station sa pakighinabi sa Banat News giapas sa anak nga si Restie ang biktima gumikan kay alas 5 sa kaadlawon pa kini sa milakaw ug wala pa gihapon makabalik sa pagpangumpay.

Apan patay na dihang nakit-an ang biktima sa kasagbutan nga dunay daghang samad tinigbasan. Sa pagsusi sa kapolisan nasutang nakaangkon ang biktima og samad tinigbasan sa liog, aping, baba ug duna pa kini gituohang dinakdakan og bato sa ulo ug ingon man may pisi pa diha sa liog niini.

Ang umagad sa biktima nga si Cresenciano Abella, 28, giimbitar sa kapolisan giingong nagkabangi ang duruha gumikan sa nawalang armas niini, ang biktima maoy gipasanginlan ning bag-uhay lang.

Kusganon hinuong mihimakak si Abella sa pasangil matud pa niya nga walay rason aron himuon niya ang linoog nga krimen. Sa pagkakaron kasamtangan pang gisubay sa kapolisan ang lain pang posibleng motibo sa pagpatay