Media gibasol nga 'killer' ni George naka-eskapo

Giangkon ni Cebu Provincial Police Office Director Supt. Vicente Loot nga dunay epekto sa imbestigasyon ug nagpadayong manhunt batok kang Roberto Jagdon ang aksyon sa ubang mga sakop sa media kalabot sa pagpatay sa tigbalitang si DyDD reporter George Benaojan.

Sa usa ka radio interview kagahapon wala hinuon iklaro ni Loot kun unsang kalihukan sa ubang mga sakop sa media ang gitumbok nga makaapekto sa ilang imbestigasyon gawas lang sa pagpasumbingay nga kun dunay makuhang impormasyon ang taga media adto lang kini ihatag kanila.

"Ang atong imbestigasyon is somehow maapektahan, pero ang pagdakop sa suspek man gyud mao unta ang dako nga pagtan-aw namo nga makuha gyud namo tungod sad sa kadaghan sa leads nga nakuha nato, ang ako lang kung dunay information ang mga members sa media unta sa amo lang ihatag dili lang himuon nga gamitong material to out-scoop each other," asoy pa ni Loot sa interview sa DyLA kagahapon.

Sa maong interview giingong usa sa mga sakop sa media (wala hinganli) ang miadto sa mga kabanay sa suspek ug mihaylo nga adto pasurenderon sa ilang media outfit .

Gituohang wala na dinhi ang suspek ug tua na karon magtago sa Mindanao human mahibaw-ing nailhan na siya ug gipangita na sa kapolisan

Samtang giduso na kagahapon sa buntag diha sa Regional Trial Court (RTC) criminal division ang kasong murder batok ni Jinky Jagdon kinsa gipasanginlang mipusil patay ni Benaojan niadtong Disyembre 1.

Matud pa ni assistant city prosecutor William Canta sa Talisay nga si Jagdon wala mo file og counter affidavit para pagtubag sa mga pasangil batok kaniya.

Si Jagdon maoy gitumbok sa tulo ka saksi nga higala, pag-umangkon ug uyab ni Benaojan nga sila si Adriano Llanos, 40-anyos, Leomer Benaojan, 16, ug Rhea Flores, 26.

Ang nahisgutang mga saksi mi-file og affidavit niadtong Disyembre 5 dungan sa pagduso sa reklamo sa mga polis batok ni Jagdon diha sa Talisay City Prosecutor.

Si Canta nagkanayon nga si Jagdon gihatagan og napulo ka adlaw pagsumiti sa iyang counter affidavit apan hangtud karon pabilin kining wala mopakita.-Uban sa taho ni Brenda Batuto