Kargador giluba

Gihatod sa tambalanan ang usa ka kargador sa merkado publiko sa dakbayan sa Lapu-Lapu human kini dunggaba sa miaging gabii nga maoy hinungdan sa grabeng samad niining naangkon.

Ang biktima mao si Christopher Dino, hingkod ang panuigon, minyo nga nagpuyo usab sa barangay Poblacion sa nahisgotang siyudad.

Si PO3 William Humoc nga gikahinabi sa Banat News miingon nga naghakot ang biktima sa binanyera nga isda dihang kalit lang gisugat sa wala mailhing tawo ug gihansakan ang kilid og kutsilyo.

Human sa maong pagdunggab ang wala hiilhing lalaki dali kaayong nakapahilayo sa maong dapit ug wala maabti sa mga polis.

Dugang pa ni PO3 Humoc nga ilang gituohan nga may kalambigitan sa trabaho sa biktima ang motibo sa pagpanunggab.