Serbisyo ni Jojo gi-renew sa CH

Gi-renew sa kagamhanan sa siyudad sa Sugbo ang serbisyo ni Elpedio "Jojo" dela Victoria Jr. pagka project director sa Bantay Dagat Commission.

Si Konsehal Jocelyn Pesquera maoy nangamahan sa resolusyon nga nag-awhag sa konseho alang sa pag-renew sa serbisyo ni dela Victoria gikan sa petsa 1 sa Enero karong sunod tuig hangtud na sa petsa 31 sa Disyembre 2006.

Kini tungod kay pormal nang mapopos ang kontrata ni dela Victoria sa maong katungdanan sa katapusan karung bulana.

Nahukman ni Mayor Tomas Osmeña ang pagpadayon sa serbisyo ni Dela Victoria human agresibo kini sa pagpatuman sa kampanya paggukod sa mga ilegal nga panagat nga mitumaw sa kadagatan dinhi sa Sugbo.

Si dela Victoria nga magdawatan og binulang suholan nga tag P16 mil kasamtangan usab kining nagserbisyo isip acting Market Administrator sa siyudad sa Sugbo.

Nasayran usab nga ning panahon ni dela Victoria pagdumala isip acting market administrator napatuman niini ang market denial ngadto sa tanang mga isda gikan sa lainlaing lugar nga nakuha gikan sa ilegal nga panagat sama niadtong mga isda nga pinabuthan.