Panuweldo sa minahan sutaon

Si Kongresista Simeon Kintanar sa ikaduhang distrito sa lalawigan sa Sugbo mipasalig nga iyang sutaon kining panuweldo ug ang mga "rescue equipments" sa Ibalong Resources Development Corporation (RDC) nga maoy nagpadagan sa mina sa karbon sa Dumalan, Dalaguete.

Ang maong lakang misantop sa hunahuna ni Kintanar dihang nasayran niya nga kasagaran sa mga trabahante sa mina nagdawatan lang og suhol nga P800, P1,200 matag kinsenas.

Matud pa ni Kintanar nga ang karisgo sa trabaho sa mga minero angayang lantawon sa kompaniya nga nagpatrabaho kanila.

Bisan kon taga bukid ug kasagaran mag-uumang kabos kining mga tawhana, apan tawo sila nga may katungod nga modawat og suhol sama sa ubang nanarbaho sa ubang trabahoan kansang trabahoon dilikado kaayo.

Matud pa ni Kintanar nga makigsulti siya kang Mayor Ronald Allan Cesante sa Dalaguete ug makigtagbo usab siya sa mga Taiwanese nga maoy tag-iya sa IRDC.