Kini human sa pagkaguba karong bag-o sa Toledo Power Plant nga nag-suplay og 40 megawatts sa Visayan Electric Company (VECO) nga maoy ilang gi-apod-apod sa ilang mga kustomer sa tibuok Metro Cebu.
Usa sa mga opisyal sa VECO nga si Paul Hubahib maoy pormal nga nipahibalo ni konsehal Sylvan Jack Jakosalem kabahin sa pagkaguba sa Toledo Power nga gikabalak-ang makatampo sa mga motumaw nga suliran sa brownout dinhi sa dakbayan kun dili dayon kini ma-repair og balik.
Gitakdang mopatawag og tigum ang konsehal ngadto sa VECO, Toledo Power, Cebu Private Power Corporation (CPPC) og National Power Corporation (NPC) aron hisgutan ang pagpangita og laing alternatibo aron kalikayan ang motumaw nga mga brownout.
Hinuon gitug-an ni Jakosalem dihang nahinabi sa Banat News nga mipasalig na hinuon ngadto kaniya ang kadagkuan sa maong kompaniya nga ma-repair ra nila og balik sulod sa napulo ka adlaw kun labing dugay karung sunod semana ang naguba nga kagamitan sa maong planta.
Apan alang sa konsehal dili gihapon kini angay'ng kompiyansahan ilabina kay nagsingabot ang Pasko ug makahatag og dakong kadaut sa ekonomiya ug turismo sa dakbayan ang masinating pag-brownout.
Gitug-an sa konsehal nga usa sa alternatibo karon nga ilang gitutokan aron pagsulbad ning mga gikahadlokang pagkulang og suplay sa kuryente ngadto sa VECO mao ang long term solution nga giduso sa Energy Regulatory Commission (ERC) nga mao ang pagpugos og gamit sa NPC sa diesel aron mamahimong stable na ang pag-suplay sa kuryente niini ngadto sa VECO.
Apan ang nakaproblema kun mapatuman ang maong plano gumikan kay ang P3 matag kilowatt hour nga palit sa VECO sa power supply sa NPC mosaka na unya ngadto sa P7 ang kilowatt hour gumikan kay mas mahal man ang diesel.
Gumikan niini gikabalak-an nga mo-umento na usab unya ang bayranan sa kuryente sa mga konsumedor kon matigayon ang maong laraw. Apan matod sa konsehal nga mas maayo na lang kining maong paagi kaysa makasinati og browout ang Sugbo nga dakong hulga sa ekonomiya ug turismo.