Training sa fish wardens sa mga lungsod giduso

Giawhag sa tsirman sa Bantay Dagat Commission Elpidio dela Victoria Jr. si Gobernador Gwendolyn Garcia ug tanang mga gobernador dinhi sa rehiyon siyete nga mogahin og pundo alang sa training seminar sa tanang mga fish examiner sa mga lokal nga kagamhanan karung sunod tuig.

Kini aron masiguro nga epektibong mapatuman ang kampanya sa 'market denial' aron wala na gyuy mga isda nga nakuha gikan sa ilegal nga panagat sama niadtong mga pinabuthan nga isda ang makasulod sa Pasil fish market.

Gitumbok ni dela Victoria dihang nahinabi sa Banat News ang mga lungsod sa Hagnaya, San Remegio, Bogo, Daan Bantayan ug Medellin nga maoy sagad dungoanan og isda dinhi sa Sugbo gikan sa lain laing lugar sama sa Bohol, Leyte, Masbate ug uban pa una pa itumod sa Pasil.

Matud ni dela Victoria segurado gyud unta nga wala nay makalahos dinhi sa dakbayan nga mga isda nga nakuha gikan sa ilegal nga panagat kun nabansay pa sa paghiling sa maong mga isda ang maong fish examiner ning maong mga lugar.

Kini gumikan kay ang finding ning maong mga examiner maoy mamahimong basihanan aron makapang-isyu na unya og auxiliary invoice ang mga lokal nga kagamhanan o mga lungsod diin maoy gigikanan sa maong mga isda.

Kini tungod kay ang tanang mga marine products sama sa isda gikinahanglan gyud kini nga maka-secure og auxiliary invoice una pa tugotang ma-transport ngadto sa laing lugar aron mahibaw-an ang gigikanan niini.

Pagkakaron gitug-an ni dela Victoria nga dili gyud kalikayan nga dunay mokawatkawat pagpayuhot sa mga pinabuthang isda diha sa Pasil gumikan sa kapakyas pag-isyo og mga auxiliary invoice ning nahisgutang lugar nga maoy hinungdan nga maglisud usab sila pag-trace niadtong mga isda nga pinabuthan nga ilang masakpan nga itumod diha sa Pasil.