Pakisusi sa kaso ni George gikalipay

Nalipay si Presidente Gloria Macapagal Arroyo sa kalambuan sa kaso sa pagpatay sa tigbalita nga si George Benaojan.

Kini human siya nasayud nga nailhan na sa kapolisan ang mastermind sa pagpatay ug napasakaan na usab og kaso ang gunman.

Si Arroyo nangumusta sa dagan sa kaso ni Benaojan atol sa dinner sa mga tigbalita didto sa Malacañang niadtong Biyernes sa gabii.

Nunot niini gisalig ni Arroyo kang Supt. Vicente Loot, hepe sa kapolisan sa lalawigan sa Sugbo ang kasulbaran sa kasong pagpatay kang Benaojan niadtong Disyembre 1.

Si Heneral Arturo Lomibao personal nga mibisita sa gipusilan kang Benaojan sa South Central Market sa Talisay ug sa haya niini human sa hitabo.

Gipadali ni Lomibao ang kasulbaran sa kaso human usab siya mandoi sa Presidente alang niini.