Isdang 'binuthan' nasakmit

Duha ka trak nga isda nga gituohang nakuha pinaagi sa dinamita gikan sa Palawan ang gisakmit sa hiniusang operasyon mga sakop sa Bureau of Fisheries and Aquatic Resources ingon man sa Bantay Dagat Task Force.

Si market administrator Elpidio "Jojo" dela Victoria nga mao usab ang chief operating officer sa Bantay Dagat task force, mitug-an nga ang mga isda nga ilang nasakmit gibana-bana nga nagkantidad og tunga sa milyon ka pesos.

Gisakmit ang maong mga isda human si BFAR examiner Corex Avenido mikonpirmar nga nakuha kini pinaagi sa eksplosibo ug gitinguha kini nga ibaligya na diha sa Pasil fish market kagahapon sa kaadlawon.

Matud ni Dela Victoria nga nakadawat siya og impormasyon gikan sa ilang tigpaniid nga may 140 ka kahon sa mga isda nga binuthan nga dad-on dinhi sa Sugbo gikan sa Palawan.

Ang impormasyon nga nakuha ni Dela Victoria adto kini idunggo sa Hagnaya, San Remegio ug ang mga kahon nga gisudlan niini dunay marka nga "MC."

Kini maoy nakaaghat ni Dela Victoria sa pagpadala og mga sakop didto sa Hagnaya, San Remegio diin ilang nakonpirmar nga ang mga kinahon nga isda gikarga na sa duha ka trak de-karga aron itumod dinhi sa dakbayan.

Ang lima ka tonelada nga isda naglakip sa isdang Solid, Barakuda, Indangan ug Mamsa gisakmit sa mga sakop sa Bantay Dagat og BFAR sa dihang miabot na sa Pasil fish market.

Matud ni Dela Victoria nga human sakmita ang maong mga isda, gihatag nila kini sa mga charitable institutions sama sa Parian Drop-in Center, Community Scout Center, Missionary of Charity, Asilo dela Medalya Milagrosa, Siervas de Nuestra Señora de Lapaz ug Couples for Christ.

Gipasabot ni Dela Victoria nga ang pagsakmit nila sa maong mga isda kabahin sa ilang kampanya pag-discourage sa mga komprador og isda nga dili na mopalit og mga isda nga binuthan.

Ang bag-ong balaod nga gilatid sa Republic Act 8550, Fishery Code of the Philippines, nagkanayon nga kadtong mga tawo nga maghupot og mga binuthang isda mahimong mapasakaan og kaso.