Saksi ni George gihulga

Nakadawat og hulga nga patyon ang saksi dungan sa lubong sa radio reporter sa DYDD El Nuevo Bantay Radyo karung hapon ang saksi nga si Adriano "Jammy" Llanos.

Gibutyag ni Llanos dihang nagpa-interview sa media radyo nga ang maong hulga subay kini sa nahipos nga impormasyon sa iyahang suod nga higala nga gi-text ngadto kaniya niadtong milabay'ng adlaw aron makapangandam og dili mokompiyansa.

Matud ni Llanos giplanohan siyang patyon sa suspek kagahapon o ba kaha karong adlawa nga atol sa paglubong kang Benaojan karung 1:00 sa hapon sa sam-ang sa Moalboal.

Gitug-an ni Llanos nga gibati siya og kahadlok pagkahipos niya sa maong impormasiyon gumikan kay nabalaka siya sa iyang pamilya og mga anak kon ugaling dunay dautang mahitabu kaniya.

Hinuon bisan pa niini gipasalig ni Llanos nga dili gyud siya mobali sa iyang pagtestigos sanglit suod niyang higala si Benaojan og gituohan niya nga siya lang maoy makahatag og kasulbaran ning maong krimen.

Gisumbong na ni Llanos ngadto kang Supt. Vicente Loot hepe sa kapolisan sa probinsya sa Sugbo kining pagpanghulga gani gitanyagan siya nga mo-apply sa witness protection program apan nagduha duha una siya gumikan kay alang kaniya mas luwas siya sa kasamtangang nahimutangan.

Si Llanos maoy gikaestorya ni Benaojan gawas sa iyang tindahan sa South Central Market sa Lawa-an-1 sa siyudad sa Talisay dihang kalit nga giduol og gipusil sa suspek nga si Jinky Jagdon niadtong Huwebes sa gabii sa milabay'ng semana.

Nakaangkon og tulo ka mga samad pinusilan si Benaojan sa iyang baba, dughan og paa ug naka-abot pa kini sa tambalanan.

Padayon pa karung gipangita sa kapulisan ang suspek og gipalawman ang imbestigasyon pagtumbok sa mastermind sa krimen.