Bugas sa di pa Pasko gipangayo

Daghang mga kawani sa lainlaing barangay dinhi sa dakbayan ang miawhag ni Konsehal Eugenio "Jingjing" Faelnar nga tabangan sila aron nga madawat nila ang pinaskohan nga tag-usa ka sakong bugas-humay gikan sa City Hall sa dili pa ang Pasko.

Si Faelnar maoy ilang gilauman nga motabang kanila sa pag-follow up sa maong pinaskohan sanglit siya maoy presidente sa Association of Barangay Council nga milingkod isip ex-officio member sa konseho sa dakbayan.

Sayo pa gipahibalo ni Faelnar nga duna siya'y tinguha nga ang matag kawani sa barangay, apil na ang mga tanod ug sakop sa Lupong Tagapamayapa, mahatagan og tag-usa ka sakong bugas-humay.

Ang konseho sa dakbayan sa Sugbo miuyon na nga ang dakbayan sa Sugbo mogahin og salapi aron gamiton sa pagpamalit og 5,000 ka sakong bugas-humay.

Wala pa hinuon aprobahi ni Mayor Tomas Osmeña ang pagpagawas sa maong gahin aron ipalit og mga bugas-humay nga ipang-apod-apod sa mga kawani sa barangay.