Task force media mo-asikaso sa lisensiya sa armas

Gilusad sa kapolisan ang "Task Force Media" aron sa paghatag og kaluag sa mga sakop sa media sa pag-aplay og lisensya sa armas.

Kini ang gibutyag ni Supt. Lyndon Lawas, hepe sa Firearms and Explosives Services Division sa kapolisan sa Rehiyon 7 atubangan sa mga sakop sa hunta sa Kapisanan ng mga Brodkaster sa Pilipinas (KBP), sa ekslusibo nilang miting sa usa ka uptown nga kan-anan niadtong Martes sa hapon.

Gipangunahan ni Edward Abad, isip tsirman sa KBP ang mga sakop sa KBP board diin sila ug si Lawas nagkasabot nga hatagan og higayon ang taga radyo, television ug print nga padad-on og armas.

Alang sa mga sakop sa KBP board, igo na kaayo ang ID sa usa ka sakop sa media nga magsilbi niyang papeles nga iduso ngadto sa buhatan ni Lawas nga wala nay rekomendasyon sa iyang manager.

Apan gitugyan sa KBP ngadto kang Lawas ang paghukom kinsa sa mga sakop sa media ang angayang hatagan og lisensya sa armas ug kinsa usab ang dili.

Kini human ipasabot ni Lawas nga usa sa mga panginahanglan sa paghatag og lisensya sa aplikante og armas mao ang hulga nga nadawat sa iyang kinabuhi.

Apan nasayod siya nga dili tanang sakop sa media anaa sa peligrong trabaho busa wala kinahanglana ang pagdala niya og armas.

Gipasabot usab ni Lawas nga ang tinuod nga sakop sa media kansang trabaho mao lamang ang pagsabwag og lihitimong kasayoran walay kabalaka nga may mohulga sa iyang kinabuhi.

Gawas lamang kun ang pagkasakop sa media himoon nang maskara alang sa daotan o personal nga motibo sa usa ka tawo diin magsukad ang usa ka hulga sa pagdumot gikan sa iyang isigkatawo.

Kining matanga sa hulga sa kinabuhi sa usa ka sakop sa media wala nay labot sa iyang trabaho kun dili personal na niya kining suliran, matud pa ni Lawas.

Maoy hinungdan nga sila si Abad ug mga sakop sa KBP board miingon nga bahala na si Lawas pag-screen kinsa sa aplikanteng taga media ang kwalipikado sa lisensya sa armas.