Katalagman gibutyag

Ang Pilipinas maoy nakadawat og grabeng latigo sa katalagman ug kalamidad nga mugna sa kinaiyahan gikan sa 1990 hangtod 2000, sa tibuok kalibotan.

Matud pa ni Dr. Carmencita Banatin, hepe sa health, emergency staff division sa Department of Health (DOH), nga ang Kahitas-an ray nasayod nganong dinhi niya ibundak sa Pilipinas ang grabeng mga bagyo, linog ug uban pang katalagman nga mugna sa kinaiyahan.

Ang ubang nasud sa kalibotan nakasinati usab og mga katalagman apan dili sama sa Pilipinas nga matag tuig kanunay nga giduaw sa tag kapin 20 ka bagyo.

Kasagaran ning maong mga katalagman misingil og kaliboan ka kinabuhi, ilabina sa linog, baha, buhawi, kilat ug uban pa.

Kining maong panghitabo, dili kapugngan sa tawo, matud pa ni Banatin.

Mas maayo pang hulga sa terorista, birds flu, foot and mouth disease, aids ug uban pa kay matambalan pa sa mga medisina nga ginama og tawo.

Apan ang mga natural nga katalagman, mugna sa kinaiyanan nga lisod kaayong matukib nganong dinhi ibundak sa nasud ang kadaghanan.

Hinuon matud pa ni Banatin nga bisan pa sa kagrabe niini, nakabangon lang gihapon ang mga Pilipino.