Indignation rally para ni George

Nagplano karon ang Cebu Federation of Beat Journalist (CFBJ) sa pagpahigayon og usa ka oras nga "indignation rally" karong Biyernes sa hapon diha sa atubangan sa Kapitolyo aron i-pressure ang awtoridad sa pagpalawom pa sa imbestigasyon sa kamatayon sa tigbalitang si George Benaojan.

Kini maoy nauyonan sa CFBJ pinanguluhan ni Joy Tumulak kinsa usa sa mga mitabang sa kapolisan aron maila ug mapasakaan og kaso si Roberto Recla Jagdon alyas Jinky nga taga Lawaan Uno dakbayan sa Talisay.

Tuyo sa CFBJ nga magkahiusa ang mga awtoridad sa ilang imbestigasyon sa maong kaso gumikan sa naobserbahan "nag-iyahay" lang og pasikatay ang mga polis ug daw pulos gustong maoy makauna sa ubang investigating units sa maong kaso.

Nunot niini awhagon sa maong grupo ang kapolisan sa paghiusa sa ilang mga lakang ug palawoman pa ang imbestigasyon sa kaso aron matino kung si kinsa ang utok sa pagpapatay.

Nagtuo ang kadaghanan sa media nga dunay tawong misugo kang Jagdon sa pagpatay kang Benaojan niadtong Huwebes sa gabii unang adlaw ning bulana diha sa South Central Market sa dakbayan sa Talisay.

Dugang pa niini mao nga kun ang kapolisan nangangkon na nga sulbad na ang maong kaso gumikan kay napasakaan na og kaso ang suspek bisan wala masikop giisip kini sa mga sakop sa media nga hilaw nga hustisya hangtud nga dili makumbikto ang mga mamumuno.

Gipaabot nga motambong sa maong rally mao ang mga kabanay ni Benaojan, mga tinun-an sa nagkadaiyang tunghaan, mga student publications, militanteng grupo nga imbitahon, mga relihiyosong pundok, Bise Mayor Michael Rama, Bise Gobernador Gregorio Sanchez, opisyal sa kapolisan ug kaparian.

Karong Disyembre 20 gipaabot usab nga mopagawas na sa hukom ang korte batok ni Edgar Belandres ang gisuspetsahang mipatay usab sa tigbalita sa Banat News nga si Allan Dizon niadtong Nobiyembre 27,2004.