93 sakong bodyong nasakmit

Niabot sa 93 ka sako nga bayanan sa kinhason nga gitawag og bodyong ug saang nga gikan sa Masbate ang nasakmit sa Bantay Dagat sa barangay Catarman, lungsod sa Lilo-an sayo kagahapon sa kaadlawon.

Lakip na sa nasakmit mao ang mga de kolor nga gasang nga puy-anan sa mga isda.

Gibana-bana sa mga tinugyanan sa Bureau of Fisheries and Aquatic Resources nga mokantidad ang maong mga kinhason og dul-an sa P2-milyones.

Matud pa ni Lou Arciaga, tigpamaba sa BFAR-7, nga gi-ban ang pagpanguha ug pagbaligya sa maong kinhason lakip na ang mga gasang.

Ang tag-iya sa sinako nga kinhason mao si Richard Yordan Nolla, 29 anyos, taga Villa Esperanza, Masbate ug gipasakaan na og kaso.

Lakip sa nasikop mao ang napulo ka tripolante sa pumpboat ug mga drayber sa duha ka de karga nga gikargahan sa mga kinhason nga sila si Jeoneroe Pelayo ug Ronel Tumacas nga pulos taga Banilad, dakbayan sa Mandaue.