Nakatampo paghakot medalya gantihan ni Tomas

Gipaabot nga makadawat og ganti gikan sa kagamhanan sa siyudad sa Sugbo ang mga Sugboanong atleta nga sakop sa Philippine team nga apil sa nakahakot og bulawang medalya ug nakatampo sa kadaugan sa Pilipinas isip maoy over all champion sa pagtapos sa 23rd Southeast Asian Games kagahapong adlawa.

Pipila sa daghang mga atletang Sugboanon ang nakatabang og hakot sa bulawang medalya sa bag-ohay lang natapos nga SEA games gilangkuban nila ni Michael Mendoza ug Belinda Adora sa dance sports competition, Marniel Dimla sa Pencak Silat.

Wala hinuon mohatag og dugang detalye ang mayor kun pilay kantidad sa ganti nga iyang ihatag ngadto sa mga atletang Sugboanon nga nakahakot og bulawang medalya.

Nunot niini, gipasidunggan ni Osmeña ang Philippine Team sa malampuson niining pag-angkon sa kampiyonato sa SEA Games sulod sa milabay'ng 46 ka tuig nang pagsalmot sa maong kompetisyon.

Gawas sa mga atleta ug sports officials sentro usab sa gipasalamatan sa mayor mao si First Gentleman Mike Arroyo gumikan kay alang niya ang hugot nga suporta niini maoy dako og natampo sa maong kalampusan nga nakapalig-on sa moral sa mga atletang Pilipino.

Gitumbok ni Osmeña ang agresibong pagpangita og mga kompaniya sa first gentleman aron maoy mo-sponsor sa pagbansaybansay sa mga atleta og uban pang panginahanglanon.

Gihulagway sa mayor nga ang kakuwang og suporta sa milabay'ng katuigan sa maong kalihukan maoy nakitang problema sa kanunay nga pagkapakyas sa Philippine Team nga mamahimong over all champion sa maong kompetisyon.