Kapitolyo ug NGOs nagsungi

Nag-away ang Kapitolyo ug ang gitukod niini nga alyansa sa mga non-government organizations nga gitawag og Partnership for Progressive Cebu (PPC).

Kini human mipabuhagay ang pangulo sa PPC, Cherry Ballescas, sa iyang kasagmuyo nga wala mosanong ang Kapitolyo sa ilang giduso nga proyekto.

Kagahapon, misumbalik si Capitol consultant Pablo John Garcia sa pagpadayag sa iyang kasagmuyo sa pamahayag ni Ballescas.

Gipasabot ni Garcia nga ang P10-milyones nga pundo nga gitumbok ni Ballescas, dili kini dihadiha magamit sa bisan kinsa nga NGO nga mangayo niini.

Matud pa ni Garcia nga kinahanglan nga ang proyekto sa NGO mohaum sa programa ni Gobernador Gwendolyn Garcia sanglit ang gobernador ang manubag niini.

Dugang pa ni Garcia nga gitun-an pa sa gobernador ang mga project proposals sa PPC diin kadaghanan niini mga seminar ug trainings.

Ang PPC mao ang pondok sa 122 ka NGO sa lalawigan sa Sugbo ug kini giumol ubos sa Provincial Development Council.