Mao kini pasidaan sa National Food Authority (NFA), ang ahensya sa gobiyerno nga gipiyalan alang ning maong gimbuhaton.
Matud pa ni Ernesto Lariosa, tigpamaba sa NFA-7 nga gituyo sa gobiyerno kining maong kampanya aron nga matibhangan ang gidaghanon sa kabataang kuwang sa sustansya o malnourish.
Ang bugas sa NFA nga anaa sa mga tindahan "iron fortified" na matud ni Lariosa.
Karong umaabot nga tuig-himoon na ang pag-inspection sa tanang bugas nga gipamaligya sa mga tindahang pribado aron pagsuta kon gisambogan na ba kini og iron.
Ang dili motuman sa balaod, multahan, prisohon ug pahamtangan og bug-at nga silot matud pa ni Lariosa.
Ang balaod nagmando nga kinahanglang butangan gyud og sustansya nga iron ang mga baligyang bugas sa merkado aron kutob sa makakaon niini ilabi na ang gagmay'ng kabataan, makakaon og sustansya.
Kini maoy paagi nga masalbar gikan sa hinanaling kamatayon ang mga kabataan ilabi na ang mga kabos gumikan sa kakuwang sa iron, matud pa ni Lariosa.
Sama sa kampanya sa gobiyerno pagbalaod nga pasagolan og iodine ang asin, diin kutob sa namaligya og dili iodized salt silotan, ingon usab niini ang pagpatuman sa iron fortified rice and corn, matud pa ni Lariosa.