Kini tungod kay kun si Osmeña ang pabut-on gusto siya nga kun tugutan man gani nga makabaton og armas ang mga sakop sa media gikinahanglan nga angayon ang tanan nga nag-atubang og mga hulga sa seguridad.
Gitinguha sa mayor nga apil sa makargadahan og armas ang mga bank managers ug uban pang mga sakop sa pribadong sektor ug mga opisyal sa gobiyerno nga peligrong target sa mga badlongong sakop sa katilingban.
Alang sa mayor mas maayo pa gani nga legalisahon ug tugotang makabaton og armas kadtong si bisan kinsa nga kuwalipikado sa paghupot ug pagkustodiya ning maong hinagiban.
Alang sa mayor ang pag-isyu og armas ngadto sa mga sakop sa media ug ubang sektor nga nagkinahanglan isip proteksiyon sa ilang kaugalingon maoy labing mahinungdanon kay sa mohangyo og mga polis nga magsilbing bodyguard.
Gitug-an sa mayor nga bisan ang iyang mga konsehal sa siyudad gi-discourage niya pagbaton og mga bodyguard nga polis nga mo-escort sa ilang mga mahinungdanong lakaw nga tambungan.
Ang pagbanhaw sa laraw nga armasan ang mga sakop sa media giduso sa Kapisanan ng mga Brodkaster sa Pilipinas (KBP) human sa nahitabung pagpusil patay karong bag-o sa reporter sa El Nuevo Bantay Radyo nga si George Benaojan.
Si Kongresista Antonio Cuenco sa habagatang bahin sa siyudad sa Sugbo mipabor ning maong lakang apan gisugyot niya nga kadto lang mga lehitimong sakop sa media ang makapahimulos niini walay labot kadtong mga blocktimers kun namalit lang og oras sa radyo.