Pagpalawom sa Mananga gitun-an

Gitun-an karon sa mga kadagkoan sa Talisay City ang pagkabkab og pagpalawom sa sapa sa Mananga aron nga dili moawas ang tubig niini sa panahon sa tingbaha.

Matud pa ni city planning and development officer Christine Delfin Homez nga dili usab kini nagpasabot nga ipakobkob nalang bisan kinsa ang maong mga bas ug graba sa sapa.

Ang gikinahanglan dinhi mao ang team nga gikan mismo sa buhatan sa city hall nga mopili niadtong mga lugar sa sapa nga mabaw na og miusdong na ang bas ug graba.

Kining mga dapita maoy palawman pinaagi sa paghabwa sa mga bas, bato ug graba nga nagdasok aron nga hapsay ang pag-agi sa tubig.

Nasinatian ni Homez nga sa panahon sa tinguwan, dali ra kaayong moawas ang baha ngadto sa ubang lugar kay dili na makasubay sa dapit sa sapa nga gidaskan nag maayo sa yuta, bas ug mga bato.

Aron nga matarong ang dagan sa tubig, kining mga dapita kakhaan ug hinloan sa hugaw nga nakasabod sa dagan sa tubig ug nagganoy sa pagbalhin na hinoon sa kaagian niini.

Sa pagkakaron giplano pa ang grupo nga maoy tahasan sa maong gimbuhaton aron nga pag-abot sa tinguwan dili na mameligro ang ubang mga lugar nga sanapan sa baha nga moawas gikan sa sapa.

Sa samang higayon padayong gihigpitan ang pagbantay sa sapa sa Mananga batok sa mga tigpangobkob og bas ug graba.