Mandaue vendors ibalhin na sa bag-ong merkado

Ang pagbalhin sa sunod tuig sa mga manindahay sa temporaryong merkado publiko sa Mandaue gipangandaman sa kagamhanan sa dakbayan.

Si Mandaue City Market Administrator Antonio Taylo mipadayag niini sa pagpakighinabi sa Banat News niadtong miaging adlaw.

Matud pa ni Taylo nga ang mokabat P219 milyones nga kantidad sa gitukod nga modernong merkado mahingpit sa pag-ugmad sa 2006 sanglit molungtad man og 18 ka bulan kontrata sa maong proyekto.

Matud pa niya nga isip kabahin sa pagpangandam nga ilang gihimo mao ang pag-update sa listahan sa mga manindahay sa nasunog nga merkado sa dakbayan nga mao karon ang gihimong temporaryong merkado.

Hinuon gipaniguro ni Taylo nga makabaton gayod og mga kaugalingong puwesto sa nagpadayon karong giugmad nga merkado publiko sa dakbayan ang mga nag-okupar og puwesto sa nasunog nga merkado.

Gumikan usab kay ang mokabat sa 700 ka manindahay nga nag-okupar karon og puwesto sa nasunog nga merkado kuwang pa alang sa giugmad nga merkado nga mokabat sa 1,400 ang stall.

Gipasabot ni Taylo nga ang mga restaurant, painitan ang mapahiluna nga labing limpiyo ug ang mga tindera niini nagsul-ob gayod og uniporme.

Dugang pa ni Taylo nga isip kabahin sa mao nilang pagpangan maoy ilang gihimo ang pagbahig sa mga puwesto sa manindahay og bugas, utanon, sari-sari store, isdaan, karnehan, tindahan sa mga panapton ug uban pa.

Samtang ang mga food processing nga matang sa baligya nga naglakip sa chorizo ug uban pa ang ipahiluna usab kini sa usa ka dapit nga limpyo ug hamugaway ang paglihok-lihok sa mga naggama niini.