Armasan ang media- Cuenco

Dayag nga gisuportahan ni Cebu South District Representative Antonio Cuenco ang planong armasan na ang mga sakop sa media gumikan niining padayong hulga sa kinabuhi sa mga tigbalita.

Si Cuenco mipadayag sa iyang kaandam sa paghimo og balaudnon nga magsuporta alang niini. Kini maoy iyang reaksyon agig tubag gipanawagan sa Kapisanan ng mga Brodkaster sa Pilipinas human sa pagkahitabo kang El Nuevo Bantay Radyo reporter George Binaojan niadtong milabayng Huwebes.

Sumala pa ni Cuenco dili siya mosupak sa maong plano apan giawhag na niyang ang hatagan lang og katungod nga makabaton og armas kadto rang mga lehitimong sakop sa media ug dili kadtong mga "blocktimers" kun kadtong mga nangangkong mga sakop sa media nga mamalit og 'airtime' sa mga sibyaanan aron makapanibya.

Wala hinuon itug-an ni Cuenco ang rason kun nganong dili niya buot maapil ang mga blocktimers sa prebilihiyong ihatag unya sa mga lehitimong sakop sa media.

Nunot niini giawhag ni Cuenco ang KBP sa paghimo og pormal nga request ngadto sa iyang buhatan aron kahimuan niya og pagtuon nga mao usab ang iyang magamit pagpresentar ngadto sa Philippine National Police.

Usa sa plano ni Cuenco mao ang pagtino kun gikinahanglan pang mohimo og linaing balaod nga motubag sa panginahanglan sa media aron makadala og armas.

Sa kasamtangang balaod dali ra ang pagpalit ug paglukat og lisensya sa armas apan malisod nga makakuha og permit to carry outside residence (PTC) gumikan sa ka-istrikto sa mga requirements niini, plano karon nga hatagan og gamayng alibyo ang mga lehitimong sakop sa media aron makabaton og PTC.

Nabantayan base sa mga rekord sa pagpamatay sa mga sakop sa media mahitabo kini gawas sa ilang mga panimalay, maong ang pagbaton og lisensyadong armas nga dili madala sa trabahuan dili gihapon makagarantiya sa kaluwasan sa mga tigbalita.

Sa sayo pa si KBP president Edward Abad mipahibalong angayan nga magbaton og armas ang mga sakop sa media, gani duna nay mga lakang gihimo nga mopailawom og gun handling seminar ang mga tigbalita.

Sa laing bahin gikatakdang pasakaan karong adlawa ang upat ka mga gidudahang suspek sa pagpatay kang Benaojan, diin usa kanila ang nailhan na og nahibaw-an dili layo ang pinuy-anan diha sa gipuy-an sa tigbalita sa Camella Homes sa dakbayan sa Talisay.

Nasuta usab nga dunay criminal record ang maong tawo base usab sa gibutyag sa mga polis giila kini ni Adriano Llanos ang testigo sa hitabo sa hulagway nga nakuha sa gipuy-an sa suspek .