"Sinadya sa Halaran" karong semana

Capiz - Gipahibawo sa mga opisyal ning probinsya nga hingpit na ang ilang pagpangandam alang sa dakong kalihukan nga himoon karon semana may kalambigitan sa ilang pagtimaan sa nainila na kaayo nga "Sinadya sa Halaran".

Si Gobernador Vicente Bermejo mipahibawo nga hingpit na gayud ang ilang pagpangandam kabahin niining maong dakong kalihukan.

Ang pamahayag ni Gobernador Bermejo gidasunan usab ni Mayor Antonio del Rosario sa dakbayan sa Roxas.

Gipahibawo sa duha ka opisyal nga nagtinabangay gayud sila aron sa ingon mapatuman sa hingpit ang maong kalihukan nga gitumong aron sa pagdani sa mga bisita ilabi na gayud sa mga turista.

Ang maong kasaulogan may kabahin sa pasalamat sa katawhan ngadto sa labawng makagagahom sa dakong grasya nga ilang nadawat.

Nahibaw-an nga gilangkub kining maong kalihukan nga linain nga gisaulog sa dakbayan ingon man sa probinsya.

Kaniadto ang dakbayan sa Roxas nagsaulog sa Sinadya samtang ang probinsya sa Capiz sa Halaran.

Gilauman sa kadagkuan sa probinsya ingon man sa dakbayan nga magmalampuson kining maong kalihukan.

Kini magsugod gikan sa Disyembre 7 ug matapos sa Disyembre 11.