Training sa mga polis

Siquijor - Gitinguha karon sa kadagkuan sa kapolisan ning probinsya nga kadtong mga polis nga bag-o pa sa ilang katungdanan ingon man kadtong dugay na sa serbisyo mahibawo sa hustong paagi pagdakop sa mga suspetsado sa bisan unsang krimen.

Gawas sa kadagkuan sa kapolisan mitambong sa maong kalihukan mao ang kadagkuan sa Provincial Prosecution Office.

Si Assistant Provincial Prosecutor Ulysses Andora miangkon nga dako gayud kaayo nga gamit sa mga polis ang ilang makuha nga kasayuran bahin sa pagdakop sa usa ka tawo nga gidudahan nga nalambigit sa usa ka krimen.

Matud pa ni Andora nga mao kini ang dakong gimbuhaton nga kinahanglan gayud nga magmatngon ang kapolisan.

Nasayran nga ang kapakyas usahay sa kapolisan sa pagpatuman sa hustong mga paagi maoy hinungdan nga ma abswelto ang kaso nga isang-at sa kapolisan batok sa usa ka gidudahan nga nalambigit sa usa ka krimen.

Gumikan niini ang kadagkuan sa kapolisan miangkon nga kinahanglan gayud kaayo nga magmatngon ang mga polis nga mupahigayon sa operasyon ilabi na gayud ang pagdakop sa usa ka tawo.