PNP alerto batok tigbaligya'g pabuto

Tagbilaran - Gipasalig sa kapolisan ning dakbayan nga kanunay sila nga alerto batok niadtong mga tawo nga magbaligya ingon man magpabuto niining nagsingabot na nga kalihukan sa pasko.

Ang pasalig giluwatan sa kadagkuan sa kapolisan sa tinguha nga maseguro nga walay dinagko nga panghitabo.

Usa karon sa gibantayan sa kapolisan mao ang mga pabuto nga gikan sa dakbayan sa Lapu-Lapu.

Kini human sa taho nga adunay mga pabuto nga gikan sa maong dakbayan nga ipalusot sa dakbayan ingon man sa nagkalain-laing mga lungsod sakay sa mga gagmayng sakyanan sa kadagatan.

Nahibaw-an nga gihimo kini niadtong mga negosyante human usab gipalig-on sa mga tinugyanan sa Philippine Coast Guard ang ilang pagbantay sa mga pasahero luwan sa barko.

Nalakip usab niini kadtong adunay mga kargamento ilabi na gayud sa pabuto.

Kini ang kadagkuan sa kapolisan mipahibawo nga dili basta basta si kinsa makadala og pabuto ilabi na gayud luwan sa barko kon wala kini makuha nga permiso.