Nadiskobrehan kini human gipatuman og balik ang surprise inspection sa buhatan sa Liquor and Licensing Division sa Cebu City Hall ngadto sa tanang mga establisamento ug mga balay kahilayan nga namaligya og ilimnong makahubog dinhi sa dakbayan sa matag alas 8:00 sa gabii hangtud na sa tungang gabii.
Gibutyag ni Aldwin Limosneros hepe sa Liquor and Licensing Division nga sagad sa mga balay kahilayan nga ilahang nasakpan nga walay liquor permit ang food street sa may Capitol area, Junquera ug dalan Pelaez nga nahimutang duol sa usa ka tunghaan ug pribadong tambalanan.
Nasayran nga subay sa ordinansa sa siyudad gidid-an kadtong mga establisemento og balay kahilayan sa pagpamaligya og mga ilimnong makahubog kon nahimutang kini sulod sa usa ka gatus metros nga gilay-on gikan sa mga tunghaan ug ospital.
Gidugang pa ni Limosneros nga kadtong mga establisamento nga ilahang masakpan nga nilapas sa lagda sa ilang pagpaninda sa maong mga ilimnong makahubog gi-obligar kini sa pagpabayad og multa nga P6 mil isip special permit.
Kini sama niadtong mga establisamento nga naninda gihapon sa maong mga ilimnong makahubog sa lapas na sa alas 10 sa gabii pataas gumikan kay kutob lang sa alas 10:00 sa gabii ang gihatag nga tagal sa pagpaninda og ilimnong makahubog dinhi sa siyudad.
Samtang matud ni Limosneros nga duna gihapoy kahigayunan nga makakuha og liquor permit kadtong mga balay patigayon nga nahimutang duol sa palibot sa ospital ug tunghaan kon makakuha kini og pagtugot gikan sa nahisgutang mga establisamento.