Si Provincial Investigation and Intelligence Branch chief Juanito Enguerra mibutyag nga ang usa sa upat ka suspek nailhan na sa kapolisan ug ugmang adlawa pasakaan na og kaso lakip na ang tulo ka mga kauban niini.
Matud pa nga pinaagi sa mga nahipos nga mga hulagway sa police galllerry gitumbok sa testigong si Adriano "Jammy" Llanos ug lain pang usa ka testigo ang hulagway sa maong tawo, nasutang ang maong tawo daan nang dunay criminal record sa kapolisan gumikan sa pagpatay ug pagpanulis.
Midumili hinuon sa pagbutyag ang PIIB sa pangalan sa suspek samtang wala pa mapasaka og pormal ang kaso ugmang adlawa.
Sa unang hulagway nga gipakita sa mga testigo wala kini mailhi sanglit nagsuot og antyohos ang suspek apan dihang nakakuha og litrato ang mga mirondang polis sa panimalay sa suspek diha sa Camella Homes sa Lawaan Talisay atol sa gihimong hot pursuit operation nakahilak ang testigo ug positibong miila sa suspek.
Giadto usab sa kapolisan ang pantalan sa Sugbu tungod sa pagdudang molarga pauli sa Butuan City ang suspek diin nagikan ang mga kaliwatan niini apan dugay nang nagpuyo sa Bogo.
Lakip na ang buhatan sa National Bureau of Investigation mibutyag nga nakaila na sila sa suspek gani sa gipakitang rogue gallery sa NBI ngadto sa mga testigo gitudlo usab nila ang hulagway sa maong lalaki.
Si kanhi NBI-7 director Reynaldo Esmeralda nga higala ni Benaojan daan nang mipadayag og interes nga mopadalag mga tawo kun gikinahanglan aron tabangan ang hiniusang imbestigasyon sa mga kaubanan dinhi pinanguluhan ni Medardo Delemos.
Si Esmeralda maoy director kaniadto sa NBI-7 dihang si Benaojan maoy giingong media consultant sa maong buhatan.
Gibutyag ni Enguera nga padayunon pa nila ang pagsubay sa motibo sa pagpatay sanglit karong wala pa nila madakpi ang mga suspek dili pa matino kung unsay motibo sa krimen.
Ang anggulong 'job related,' personal ug negosyo wala pa isalikway sa awtoridad ning mga higayuna.Lakip sa giplanuhang buot ipasubay ni CPPO Chief Vicente Loot ang kalambigitan sa gipamahayag ni Cebu Customs Collector Maria Lourdes Mangaoang nga daghang naglagot nga mga negosyante ug opisyal sa reporter.
Si Benaojan kanhi Customs beat reporter kaniadto ug giingong mahait nga mangomentaryo sa mga smugglers sa adwana.
Si PNP Director Arturo Lomibao misusi sa gikahitaboan niadtong Biyernes ug misaad nga dili lung-an ang imbestigasyon sa kaso hangtud nga dili mataral sa korte ang sad-an.
"I would like to reiterate that the PNP looks highly at the media with high regard both as a vital link to the people and a formidable partner in our endeavor to pursue the mission of enforcing the law and maintaining peace and order," asoy pa ni Lomibao.
Si Benaojan gipusil samtang naglingkod diha atubangan sa iyang tindahan sa merkado sa Lawaan, Talisay sa nag-inusarang gunman, upat ka samad pinusilan sa dughan, tuhod ug liog nga lapus-lapus ang nakaingon sa kamatayon niini.
Base sa mga taho nga ang suspetsado dunay gipahuwat nga taxi diin human sa pagpamusil niini misakay kini ngadto sa nahisgutang taxi ug mipuli kini sa drayber og maneho paingon dinhi sa dakbayan.
Diin dunay laing duha ka lalaki nga gidudahang look-out ang mibiya usab dayon sa lugar og misakay og PUJ nga dunay rota nga Minglanilla.
Gikataho nga usa sa mga suspetsado nagpuyo diha sa Camella Homes sa Barangay Lawaan Talisay ubos nga bahin sa Azienda Milan diin si Benaojan nagpuyo.
Si Cebu City Councilor Arsenio Pacaña sa pakighinabi sa Banat News mipadayag nga mipadangat na siya og resolusyon sa Konseho sa pag-awhag sa NBI sa paghimo og subsob nga imbestigasyon sa kaso ug mipadayag ang konsehal sa pagkundenar sa hitabo. - Uban sa taho ni Brenda D. Batuto ug Darrel Carumba