Naunay sa pugakhang patay

Patay ang usa ka vulcanizing technician human kini maunay sa gihuptan niining armas nga pugakhang nga nahulog sa yuta ug miboto niadtong Huwebes sa gabii sa dalan V. Rama sa barangay Calamba sa dakbayan sa Sugbo.

Ang biktima mao si Alex Tradio Patigdasa, 29 anyos, minyo, nga taga Fishport sa barangay Pasil niining siyudad.

Base sa imbestigasyon ni SPO3 Zenaido Pastorfide Jr., sa Homicide Section sa kapolisan ang biktima nagdala sa maong hinagiban ug kalit kining natagak sa yuta ug miboto.

Matud pa ni Pastorfide nga si Marilou Banto Gamboa, 43 anyos ug nanag-iya og sari-sari store sa maong dapit nga nakasaksi niini ang miingon nga nag-inusara lamang ang biktima dihang nabati niya ang boto sa armas.

Samtang si Felix Tradio Patigdas, 37 anyos, minyo nga tag-iya sa maong vulcanizing shop ug uyoan sa biktima maoy dali nga midala sa biktima sa Cebu City Medical Center.

Apan gideklarar kini sa mga doktor nga patay nang nahidangat tungod sa grabeng igo niini sa dughan.

Si Pastorfide miingon nga ilang nakaplagan sa dapit nahagbaan sa biktima ang usa ka pugakhang.