Koleksiyon sa liquor doble

Mi-doble karon ang koleksyon sa Liquor and Licensing Division sa City Hall human gihigpitan niini ang pagpalukat og permit ingon man aron makabayad og buhis kadtong mga establisamento nga naninda og mga ilimnong makahubog dinhi sa dakbayan.

Gikan niadtong Enero ning tuiga hangtod sa milabay'ng bulan sa Oktobre mikabat na og kapin sa P9 milyones ang nakolekta sa siyudad gikan niadtong mga establisamento nga nasakpan nilang walay permit og gipabayad og multa.

Kini mas taas kon itandi niadtong milabay'ng tuig nga duna lay P5.1 milyones nga koleksyon ang maong buhatan.

Gani gibutyag ni Aldwin Limosneros hepe sa Liquor and Licensing Division nga gilaoman nila nga moabot pa og kapin sa P10 milyones ang makolekta karong tuiga gumikan kay duna pa may ubang mga establisamento nga nasakpan nilang namaligya og walay permit ang nakig-areglo na karon sa City Treasurers Office aron mabayran ang maong obligasyon.

Kini naglakip na sa penalty, surcharge ug interes niining bayranan human gihingusgan karon sa siyudad ang paggukod niadtong mga establisamento nga naninda og ilimnong makahubog nga way permit.