Pasangil ni Thaksin sa SEAG wa ikahingangha

Wala ikahingangha apan gikasagmuyo sa mga opisyales sa Philippine Sports Commission ingon man Cebu Sports Organizing Committee ang gipamahayag sa Primero Ministro sa nasud sa Thailand nga si Thaksin Sinawatra kalabot sa giingong dunay pagpanikas nga nahitabo sa officiating sa 23rd South East Asian Games sa Pilipinas.

Si Cebu Sports Commission Chairman Jonathan Guardo sa pakighinabi sa mga tigbalita nagkanayon nga walay pagpanikas nga nahitabo sa officiating sa matag event sa duwa ug mipanalipod sa mga kadaugan sa mga Pinoy athletes nga maoy leading karon sa maong torneyo.

"Of course that is a serious allegations specially coming from Thaksin Sinawatra, I think we are leading and Thailand is not doing what they are expected to do," asoy pang Guardo sa usa ka interbyu sa lokal nga sibyaanan.

Matud pa ni Guardo nga dako kaayo og deperensya kung diha sa imong kaugalingong teritoryo himoa ang usa ka kompetisyon gumikan sa homecourt advantage ingon man dinala usab sa pag-abiba sa mga paisano sa matag atleta.

Dugang pa niya nga na-maximize sa mga atletang Pinoy ang nakuhang suporta gikan sa mga paisano ingon man mas nakauna pa og praktis ang mga Pilipino sa mga venue nga giduwaan maong nahanas na sila sa ilang himuon.

Giangkon usab ni Guardo nga dunay mga duwa nga bisan nakauna na dinhi ang mga Pilipino sa pagpraktis nakuha gihapon sa mga kaatbang nga mga langyaw ang medalyang bulawan.

Si Philippine Sports Commission chairman Jose Peping Cojuangco mihimakak usab sa alegasyon sa ubang mga nasud batok sa Pilipinas. "Hindi naman pwedeng madaya, kasi kitang-kita sa telebisyon ang mga nangyayari," sumala pa ni Cojuangco.

Nunot sa pamahayag nga giluwatan ni Sinawatra, gimanduan ni Presidente Gloria Arroyo ang tanang organizers sa 23rd SEA Games pagtino sa kamatuoran sa giingong dili patas nga pag-officiate sa events sulod sa 24 oras sanglit dili gusto ang pangulo nga madaut ang espirito sa panaghiusa sa 11 ka managsilingang nasud. -Edwin Ian Melecio