P1.9M vs dengue giuyonan

Gi-aprobahan na ni Mayor Tomas Osmeña ang paggasto sa dakbayan og P1.9 milyones aron gamiton sa pagpamalit og kagamitan sa pagpangandam nga maalkontrahan ang problema sa sakit nga dengue karong sunod tuig.

Kini human ang resolusyon ni Konsehal Agustus Pe nga naggahin sa maong kantidad nga anha kuhaon sa calamity fund giduso ngadto sa buhatan ni Osmeña human kini uyoni sa mga sakop sa konseho.

Ang mga kemikal nga namatud-an nga epektibong pangpatay sa mga lamok maoy pamaliton sa dakbayan aron pangandaman sa motumaw na usab unya nga problema karong sunod tuig.

Ang Banat News wala pa makakuha sa labing bag-o nga statistics sa dengue cases gikan sa Cebu City health department, apan namatud-an nga mikunhod karong tuiga ang gidaghanon sa mga natakboyan og dengue.

Ang barangay Guadalupe nga maoy pinuy-anan sa mayor maoy nakarehistro sa labing daghan og mga kaso sa dengue karung tuiga.