Mismong si Thai Prime Minister Thaksin Shinawatra mipadayag sa iyang pagduda sa mga officiating.
Si Shinawatra mikwestiyon sa resulta sa mga torneyo ug mihulga pang iya kining ireklamo sa umaabot nga summit sa Association of Southeast Asian Nations ngadto sa Malaysia (ASEAN) karong Disyembre.
Mipasangil ang lider sa Thailand nga ang officiating bodies miguba sa imahe sa SEA Games tungod sa pagpanglimbong.
Dugang sa pagsaway ug pasangil nga gibato sa Pilipinas mao ang reklamo sa mismong chief sa Vietnamese delegation nga gitagana nang daan ang mga bulawang medalya ngadto sa Pilipinas.
Kini iyang gibutyag ngadto sa lokal nga pamantalaan sa ilang nasud.
Samtang si Robert Aventajado committee chairman sa Philippine Olympic Committee nagkanayon nga walay nadawat nga mga reklamo ang mga opisyal sa POC gikan sa head Thai delegation ug sa uban nga mga mission chief.
Matud pa niya nga tanang nasud misalmot sa SEA Games dunay mga gipresentar nga referee ngadto sa tanang duwa. Gidugang usab ni Aventajado nga ang SEA Games estrikto sa pagdumala sa mga patakaran maong imposible kaayong dunay mahitabong tikas niini.
Kagahapon ang Pilipinas nag-una sa 11 ka nasud nga miapil sa SEA games diin mikuha kini og 49 ka gold medals, nagsunod ang Vietnam nga dunay 25 ka gold medals kinsa maoy kanhi host sa 2003 SEA Games ikatulo ang Thailand nga dunay 19 ka gold medals.