50 ka gramos shabu 'sakmit

Gibanabanang 50 gramos nga gituohang shabu ang nasakmit sa mga sakop sa Philippine Drug Enforcement Agency 7 atol sa gihimong buy-bust kagahapon sa buntag diha sa Barangay Pagsabungan dakbayan sa Mandaue.

Duha ka mga lalaki ang nasikop sa grupo nila ni PDEA7 deputy director Josefino Ligan human makuhai og balor P200,000 nga gidudahang shabu dihang napalitan sa mga sakop sa PDEA.

Giila ang mga gipangdakop mao sila si Jay Ar (apelyedo gipugngan) lumad nga taga Manila ug Alex Himaya Doque,19, taga Kanlaon City Negros Oriental kinsa parehong nangangkong mga katabang sa gidudahang drug pusher nga giila sa duha nga si Michael.

Gihimuan og duha ka semanang surveillance sa PDEA7 ang suspek nga si Michael human makadawat og impormasyon nga nalambigit kini sa pagpamiligya og iligal nga drugas.

Nunot niini mi-order ang PDEA og drugas diha sa suspek apan ang mga nangadakpan mao ray miatubang sa mga polis sa paghatag sa drugas diha gawas sa panimalay ni Michael.

Gisuwayan og sulod sa kapolisan ang balay sa suspek aron kini sikupon apan giingong wala kini didto ug gituohang nakaikyas dihang nahitabo ang komosyon diha sa gawas.