Dili minilyon gasto sa fireworks

Giklaro ni Mayor Tomas Osmeña nga dili tinuod nga migasto og minilyon ka pesos ang kagamhanan sa siyudad sa Sugbo sa fireworks display atol sa opening sa 23rd Southeast Asian Games niadtong Biyernes sa milabay'ng semana.

Giluwatan kining maong katin-awan sa mayor human nakadawat og pagsaway gikan ni Arsobispo Ricardo Cardinal Vidal ang mga opisyal sa siyudad gumikan sa dakong kantidad nga gigasto niini sa fireworks display nga unta mas gikinahanglan unta ang maong kantidad aron ipalit og mga pagkaon niadtong mga kabus ug gigutom nga kabataan.

Apan matud ni Osmeña mokabat lang og P300 mil ang kinatibuk-ang nagasto sa dakbayan sa fireworks display sa opening SEA games ug dili tinuod nga miabot og kapin sa usa ka milyon.

Gibutyag ni Osmeña nga personal gyud niyang gipakighinabian ang in-charge sa fireworks display nga si Boggie Lim ug nitug-an kini nga P225 mil lang ang nagasto sa mga fireworks nga gibuhian sa Cebu City Sports Center og laing P75 mil sa fireworks nga diha sa stage nga bahin.

Nagkanayon si Osmeña nga iya nang gipahibalo ang Cardinal niini pagkahuman sa Santos nga Misa sa kapistahan sa Alliance of Two Hearts sa Banawa diin ang Cardinal maoy misaulog.

Wala hinuon mobasol ang mayor ngadto sa mga gihimong pagsaway sa Cardinal ngadto kanilang mga opisyal sa siyudad gumikan kay alang niya biktima lang kini sa mga sayop nga paghatag og impormasyon sa mga sakop sa media.

Nunot niini, gipadayag ni Osmeña nga karun lang bulana nakagasto na ang siyudad og P2 milyones sa feeding program niini ngadto sa mga pamilya nga nabiktima sa mga milabay'ng sunog dinhi sa dakbayan sa tibuok bulan sa Nobiyembre.

Nasayran nga gisugyot usab sa Cardinal nga angay'ng magpasiugda ang siyudad og mga feeding program center inay nga gamiton ang pundo niini sa pag-usik usik sama sa bongga nga fireworks display sa opening sa SEA games.