Tulisan napatay

Nahabwa ang ginhawaan sa usa ka wala mailhing lalaki kinsa gitabangag kulata ug gidunggab sa mga residente sa barangay Mambaling human kini gidudahang kauban sa upat ka lalaking mitulis sa usa ka dalaga nga nagpakitabang diha sa may dalan Cabreros, barangay Basak-San Nicolas ning dakbayan niadtong milabay'ng gabii.

Wala na matabang ang lalaking gibana-banang nagpangidaron og 25 ngadto sa 30 anyos, may gitas-ong 5'4", kasarangan ang panglawas, nagsul-ob og kolduroy ug sando nga kolor "neon green" nga may tatak nga Buhisan.

Sumala pa sa imbestigasyon ni SPO3 Zenaido Pastorfide sa Homicide Section sa pakighinabi sa Banat News nga usa ka Analyn Legaspi, 20 anyos, lumad nga taga Dalaguete, nangayog tabang sa mga residente human siya tulisa sa maong tawo.

Matud pa nga naglakaw ang biktima diha sa may dalan N.Bacalso atbang sa Rubberworld padulong pauli sa Cabreros dihang kalit nga gisugat ug gitionan og kutsilyo sa usa ka lalaki dayon gipangayo ang cellphone niini una pa miikyas.

Si Legaspi daling misiyagit ug nagpatabang sa mga istambay ug mga residente hinungdan nga nahitabo ang ginukdanay ug naabot diha sa Sitio Back Rubberworld sa barangay Mambaling diin naapsi ang lalaki.

Gituohang diha nahitabo ang pagkuninit sa mga tawo ug istambay sa biktima. Gani giingong ang ubang mga mitabang og kulata sa biktima nag-edad pa og 14 anyos.

Sa pagbiya sa mga tawo duna nay dakong samad nga nawiwi diha sa tiyan sa biktima uban sa mga bun-og ug pangos gumikan sa pagdagmal sa mga tawo.

Si Pastorfide nagkanayon nga positibong giila ni Legaspi ang gipatay nga usa sa upat ka mga tawong mitulis kaniya apan dili kini ang mition kaniya og kutsilyo ug mikuha sa iyang cellphone.

Nasuta nga bisan ang cellphone sa biktima wala na ma-recover diha sa crime scene ug gituohang nadala kini sa mga nakaikyas nga kaubanan sa gipatay o ba kaha dunay usa sa mga residente nga maoy nakapunit sa maong cellphone.